Meteus FERNANDES Chefe Departamentu Inventa Valor Osan Manutensaun Kareta Foun Estadu nian

Alegasaun Korupsaun iha Governasaun AMP sai tiha ona diskusaun lor-loron timor oan nian. Ezemplu dadus balun Dili Notisia Semanal hetan akontese iha Ministeriu balun. Iha tinan 2011 hafoin Orsamentu Jeral Estadu promulga husi Presidente Ramos Horta Ministeriu balun foti deit ezemplu Ministeriu Solidariedade Sosial gasta total osan povo nian US$12,000,00 atu halo manutensaun ba kareta estadu nian nebe Ministeriu MSS foin sosa.  Kareta estadu foun tebes Chefe Departamentu Administrasaun no Finansas MSS nian husu halo manutensaun ho folin as tebes, folin nebe naton atu sosa kareta segundu maun ida. Kareta estadu ho plaka 3-387G uza husi Chefe Departamentu Mateus Fernandes selu ba Fitun Kaduak Ofisina Unipessoal tuir invoice husi offisina nee hamutuk US$12,900,00 atu troka sasan nebe karik la troka iha fulan Marsu nia laran.

Tuir fontes nebe Dili Notisia Semanal halibur husi populasaun iha Aimutin fatin Sr Mateus Fernandes hela ba, hafoin Governu AMP hamrik Sr Mateus Fernandes nia moris sai oin seluk, kareta estado simu husi MSS Chefe Departamentu nee taka tiha vidru metan. Sr Mateus Fernandes iha duni indisius alegasaun naok osan povo nian barak uza nia kargu hanesan Chefe Departamentu Planu, Program no Finansas iha MSS hodi hariku an. Tuir informasaun nebe iha situasaun hanesan Sr Mateus Fernandes akontese tan Minstra Domingas Alves ho nia Chefe Gabinete karik involve hotu iha KKN hodi nauk osan povo nian.

Ministro Agrikultura Mariano Sabinu Halo Uma Iha Becora

Ministra Lucia Brandao Lobato Halo Uma iha Welaluho

Ministra Justisa Lucia Brandao Lobato maske iha problema barak ho justisa tan alegasaun korupsaun, abuzu poder no maske sai ona hanesan arguida ba kazus balun hasoru nia, Ministra Justisa nia moris lao hanesan babain. Dili Semanal hetan konsege informasaun balun relasiona ho Ministra Justisa nia uma nebe halo iha Welaluho besik Natarbora.

Uma nebe Ministra Justisa Lucia Lobato halo iha Welaluho uma ida diak tebes tuir kalkulu Dili Semanal halo uma nebe Ministra Justisa halo nia gastus bele liu US$200,000. Uma halo iha rai luan iha Welaluho besik Natarbora bele sai uma ida diak tebes atu hela ba ema nebe karik iha osan hanesan Ministra Lucia Brandao Lobato.  Lucia Lobato Ministra nia laen sr Americo Lopez mos hein hela prosessu iha tribunal tan kazu pualaka,http://temposemanaltimor.blogspot.com/2009/09/pualaka-scandal-3-million.html. Kazu seluk nebe Ministra Lucia Lobatu rasik involve iha kazu seluk kona ba sosa uniforme ba guardas prisonais sira, http://temposemanaltimor.blogspot.com/2009/04/translation-tempo-semanal-edition-135.html,http://temposemanaltimor.blogspot.com/2009/03/tempo-semanal-edisaun-132.html